ඓශ්චර්යා මේ නටන්නෙ බුදු පිළිරුවක් ඉදිරිපිටද ?

පහතින් දැක්වෙන්නේ මේ දිනවල EAP මණ්ඩලයේ සවෝයි 2 හා ලිබර්ටි  යන සිනමාහල් වල තිරගතකරන Guzaarish

චිත්‍රපටයේ ගීතයකි. සැබැවින්ම ඓශ්චර්යා මේ නටන්නෙ බුදු පිළිරුවක් ඉදිරිපිටද ?

ප.ලි. – මේක මට පෙන්නුවෙ අපේ මල්ලී  😛

ප්‍රතිචාර 17

Filed under ජාත්‍යන්තර

අනේ ඉතින් මහජනයා වෙනුවෙන්නේ

කථානායකවරයාට බිත්තර ප්‍රහාරයක්

යුක්‍රේන පාර්ලිමේන්තුවේ විපක්ෂ මන්ත්‍රීවරු හා ආණ්ඩු පක්ෂ මන්ත්‍රීවරුන් අතර ගැටුමක් පසුගියදා සිදුවිය. යුක්‍රේනය පැරණි සෝවියට් සමූහාණ්ඩුවට අයත්ව පැවති රටකි. නමුත්, සෝවියට් සමූහාණ්ඩුව බිඳවැටීමෙන් අනතුරුව, එයට අයත්ව පැවති බොහෝ රටවල මෙන් මෙහිද, රුසියාවට පක්ෂපාතී පක්ෂ හා ඇමරිකාව ප්‍රමුඛ බටහිරට පක්ෂපාතී පක්ෂ ලෙස පක්ෂ දෙකොට්ඨාසයක් බිහිවිය. මේ වනවිට යුක්‍රේනයේ පාලනය හිමිව ඇත්තේ රුසියානු පාක්ෂික කණ්ඩායමක් වෙතයි. මෙම ගැටුමට මූලික හේතුව වී ඇත්තේ යුක්‍රේනය තුළ පවතින රුසියානු නාවික මූලස්ථානයක් තවදුරටත් පවත්වාගෙනයාමට ආණ්ඩු පක්ෂය ගත් තීරණයයි. මෙම තීරණයට විරුද්ධවූ විපක්ෂය ආණ්ඩුපක්ෂ මන්ත්‍රීවරුන්ට හා කථානායකවරයාට පහරදීමටත්, දුම් බෝම්බ එල්ලකිරීමටත් කටයුතු කරඇත. මේ පිළිබඳව අපට පවසීමට ඇත්තේ, යුක්‍රේන වැසියා බෙහෙවින් වාසනාවන්තය. මන්ද, අනේ ඉතින් මහජනයා වෙනුවෙන්නේ මේ සේරම කරන්නේ.

ප්‍රතිචාර 6

Filed under ජාත්‍යන්තර, දේශපාලන, රසවත්

මාසයක් ගෙදර

ChickenCartoon

කිහිප දිනක් තිස්සේ මේ සටහන ලියන්න හිටියත්, එය මා හට මඟහැරී ගියා. කොහොමහරි දැන් ඉතින් ලියලම තමයි පස්ස බලන්නෙ කියල ලියන්න පටන් ගත්තා. සති 2ක් (ඡන්ද නිවාඩු සතිය රහිතව) සරසවි යාමට නොහැකි වුනා දරුණු උණ රෝගයක් හේතුවෙන්. දොස්තරලානම් කිව්වෙ වෛරස් උණක් කියලයි. සති 2ක් උණ තිබුනා. ඡන්දෙට සතියක් නිවාඩු හම්බුනනිසා රෙස්ට් කරන්නත් පුළුවන් වුනා. අසනීපෙන් පස්සෙ හා හා පුරා කියල පසුගිය සතියේ සඳුදා කැම්පස් ගියා. වෙනද වගේ නෙමේ. කන්ද නැඟලා එනකොට හොඳ ගනන්. කකුල් දෙක පණ නැතිවෙනවා.

උදේම තිබ්බෙ මාගේ ප්‍රියතම විෂය – ඉලෙක්ට්‍රොනික්ස්. අහෝ !! මේ කිනම් විපර්යාසයක්ද ? මෙතෙක් මාහට හොඳින් වැටහුණු විෂය ! දැන් අසන්දිට්ඨිකයි. ඉන් පසුව තිබුනේ ඉලෙක්ට්‍රොනික්ස් ප්‍රායෝගික පන්තිය. ඒකනම් ටොප්. හැබැයි අවුලකට තිබ්බෙ පැය 3ක් හිටගෙන ඉන්න එකතමා. ප්‍රායෝගිකය කරන වේලාවේ මාහට එතරම් වැටහීමක් නොතිබුනද, දෙපා අමාරුව දැනෙන්න ගත්තේ ඉන් පසුවයි. හප්පා ! ඇවිදගන්නත් බෑ විසිවෙනව වගේ. ඔළුවත් කැරකෙනවා. එදා බෝඩිමට ගිහින් හොඳට නිදාගත්තා. හැබැයි ඉතින් හවස් වරුවෙ, පොත් ටිකක් අල්ලගෙන නොතේරුණු ඉලෙක්ට්‍රොනික්ස් පාඩම ගොඩදාගන්නත් ට්‍රයිකළා.

පහුවෙනිදා කැම්පස් යන්න හම්බුනේ නෑ. ඇඟට පණ නෑ. ඔළුව කැරකෙනවා. ( පෘථිවිය භ්‍රමණයවන බව නිරීක්ෂණාත්මකව සනාථ කරගැනීම ) බෝඩිමේ ඇන්ටිලා මට බනිනවා, මම vegetarian නිසා  ඇඟේ ශක්තිය මදි කියලා. {බෝඩිමේ ඇන්ටිලා දෙන්නෙක් ඉන්නවා ( අක්කයි, නංගියි ). තව මේ දෙන්නගෙ සහෝදරියකගෙ පුතුන් දෙදෙනා ඉන්නවා(මට අයියලා)} ඔය එක අයිය කෙනෙකුටත් මට උණ තිබුණ කාලෙම ඩෙංගු හැඳුනා. එයත් හිටපු vegetarian කෙනෙක්. හැබැයි ලෙඩවුනයින් පස්සෙ ඇන්ටිලාගෙ බලපෑම මත, එයා ඕනදෙයක් කනවා. බදාදා තාත්තා ආව මාව ගෙදර එක්ක යන්න. දැන් ගෙදර ඇවිත් සතියක් වුනා. හිටියටවඩා දැන් තත්වෙ හොඳයි. ගෙදරිනුත් කියන්නෙ vegetarian පැත්තක දාන්න කියලා.

නමුත් මගෙ හෘදය සාක්ෂිය අනුව එය කළ නොහැකියි. මා දරන මතය අනුවනම් මාංශ පරිභෝජනය නොකරන විට, අහිංසක සතුන්ගේ ජීවිත නැතිකිරීමට අවශ්‍යතා අවමවේ. සසර කෙළවර වනතෙක් මා රැකීමට ඇරඹූ සීලයක්, මේ එක් ජීවිතයක පැවැත්ම උදෙසා බිඳ ගත යුතුද ? මා දන්නා ආකාරයට සීල  පරමත්ත පාරමිතාව යනු මෙයයි. මෙය දිගටම රක්ෂා කිරීම වීර්ය පාරමිතාවක්ද වනවා. ඔබට ගැටලුවක් පැන නඟින්න පුළුවන්, මීළඟ භවයන් වළදීත් මේ භවයේ රකිනා සීලයන් රැකිය හැකිදැයි; යනුවෙන්. සසර පුරුද්ද අනුව එය සිදුවිය හැකිබව මාගේ විශ්වාසයයි. අනෙක, කුසල් හා පින් සිදුකිරීමට සුදුසු පරිසරයක ඉපදීමටද පිනක් තිබිය යුතුවනවා.

ප්‍රතිචාර 9

Filed under මට වෙච්ච වැඩ, මම, විශ්ව විද්‍යාලය

ගෘහස්ථ මැතිවරණ ප්‍රචන්ඩ ක්‍රියා ?

අද දින උදෑසන ඡන්ද පත්‍රිකා භාරදීමට තැපැල් මහතා පැමිණීම, මා වසර ගණනක් පෙරුම් පිරූ අවස්ථාවක් විය. මන්ද, මේ එළඹෙනුයේ මා ඡන්දය භාවිතාකරන ප්‍රථම අවස්ථාවයි. කෙසේවුවද, මේ දිනවල ඇතිවී තිබෙන ඡන්ද උණුසුමත් සමඟ අපේ නිවස එකම ගාලගෝට්ටියකි. පියා පාරම්පරික UNP කාරයෙකි. මව පාරම්පරික ශ්‍රී ලංකා කාරියකි. ඇයගේ පියාගේ අභාවයත් සමඟ ඕ මගේ පියාගේ පක්ෂයට ගියාය. පියාගේ මව නිවසේ සිටියද, ඇයට සිහිකල්පනාවක් නැත. මල්ලිට ඡන්දය දැමීමට වයස මදි වුවද, මා එය සපුරා ඇත. එබැවින් අපේ ගෙදර ඡන්ද ත්‍රිත්වයක් ඇත.

මා ඡන්දය ප්‍රකාශ කරන්නේ බුද්ධිමත්ව සිතා බලාය. ඒ අනුව මගේ ටිකිරි මොළේට වැටහෙන ආකාරයටනම්, මෙවර මා ඡන්දය ප්‍රකාශ කළයුතු වන්නේ රටේ ඒකීය භාවය සුරකින නායකයෙකු හටයි.

නමුත් මවගෙන් මේවනවිට දැඩි පීඩනයක් මාවෙත යොමුවෙමින් පවතියි. ඔවුනට අවශ්‍යය වනුයේ මගේ ඡන්දය මා ලවාම හොර ඡන්දයක් කිරීමයි. මෙම සතිය අසනීප තත්වයක් නිසා විශ්වවිද්‍යාලයට නොගිය මාහට පුරා සතියම මෙම කංකරච්චලයට මුහුණදීමට සිදුවිය. කුමන බලපෑම් පැමිණියද මාගේ ඡන්දයට කාටවත් බලපෑම් කළ නොහැක. එය මාගේ අයිතියකි. උප්පැන්න සහතිකයෙහි හෝ විවාහ සහතිකයෙහි තමන් ඡන්දයදෙන පක්ෂයක් දමා නොමැති බැවින් ඔබද එය ඔබට රිසිසේ, ඔබගේ ප්‍රතිපත්ති වලට වඩාත් ගැලපෙන අපේක්ෂකයා වෙනුවෙන් භාවිතා කරන්න.

ප්‍රතිචාර 14

Filed under දේශපාලන, මට වෙච්ච වැඩ, මම

පොල් පොට්

හිට්ලර්ලා, ඉඩි අමීන්ලා, පොල් පොට්ලා ගැන කියවෙන මේ යුගයේදී, මීට සයවසරකට පමණපෙර මා ලැබූ අත්දැකීමක් පැවසීමට අදහස් කලෙමි. එකළ මාගේ මලනුවන් සත්වන ශ්‍රේණියේ පමණ ඉගෙනුම ලබමින් සිටියේය. මා ඔහුට තෙවසරක් වැඩිමහළුය. එකළ ඔහුගේ තිබූ විවිධ චරිත ලක්ෂණ අනුව මා ඔහුට විවිධ නම් පැවසීය. ඒවාට ගැලපෙන අයුරින් ඔහු මටද විවිධ නම් පැවසීය. දිනක් අප අතර මෙවන් සංවාදයක් ඇතිවිය;

මම   :- පොල් පොට්
මල්ලි:- ඩෙසිකට්

කදිම කරුණ වනුයේ, ඒවන විට මා ඩෙසිකට් යනු කුමක්දැයි නොදැන සිටීමයි.

ප්‍රතිචාර 4

Filed under ජාත්‍යන්තර, දේශපාලන, මට වෙච්ච වැඩ, මම, රසවත්

ඌරන් කැකුණ තලනවිට හඹන් කුකුළන්ට ජය මඟුල්

පසුගිය සතියේදී ඇමරිකාවේ Illinois නීති විද්‍යාලයේ මහාචාර්යවරයකුවන (අපට අනුව පඬියකුවන) ෆ්‍රැන්සිස් ඒ. බොයිලි ශ්‍රී ලංකාව සම්බන්ධ වැදගත් පොතක් එළිදැක්වීය. මුලු රටම ජනාධිපතිවරන උනුසුමෙන් ඇළලීයමින් පවතින මෙවන් සමයක ශ්‍රී ලංකාවට එරෙහිව ක්‍රියාත්මක වන කුමන්ත්‍රණ නැවතත් ඇරඹී ඇති අයුරක් අපට පෙනීයයි. නොවැම්බර් 29දා එළිදැක්වූ ශ්‍රී ලංකාවේ දෙමළ සංහාරය නම් බොයිලිගේ පොතින් විඳහා දක්වනුයේ විදේශයක ඊළාම් රාජ්‍යයක් ගොඩනැඟීමේ වැදගත්කමයි. ටැමිල් නෙට් අඩවියට අනුව මෙවැනි කටයුතු සම්බන්ධයෙන් මොහුහට ඉතිහාසයක් පවතී. 1993 දී Bosnia හා Herzegovina සම්බන්ධ ගැටලුව වැනි කරුණු ජාත්‍යන්තර අධිකරනය වෙත රැගෙන යාමට මොහු සමත්වී ඇත.

මේ අතර, 2011 දී ශ්‍රී ලංකාවේදී පැවැත්වීමට යෝජනාවී තිබූ පොදු රාජ්‍ය මණ්ඩලීය රාජ්‍යනායක සමුළුව මෙරට පැවැත්වීමට බිරිතානි අග්‍රාමාත්‍යා ගෝර්ඩ්න් බ්‍රවුන් හා කැනඩා අග්‍රාමාත්‍ය ස්ටීපන් හාපර් විරෝධය පළකර තිබේ. ඒ අනුව 2011 දී එය ඔස්ට්‍රේලියාවේදී පැවැත්වෙනු ඇත. අප රටට එරෙහිව මෙවන් කුමන්ත්‍රණ සිදුවන මෙවන් මොහොතක, අපි ජධිපතිවරණයක සිරවී සිටිමු. බෙදුම් වාදය යුධමය වශයෙන් පරාජයට සහය දැක්වූ යුධ වීරයන්

” LTTE යට උදව් කරපු කණ්ඩායම්වලටත් මගේ ප්‍රතිපත්ති කිව්වා. ඒ අයටත් මට සහය දිය හැකියි. ප්‍රභාකරන්ගේ මවුපියන් වුණත් මට සහය දක්වනවා නම් මා කැමතියි. ”

වැනි ප්‍රකාශ කිරීම, දකුණතින් ලැබූ ජයග්‍රහනය වමතින් විසිකිරීමට සැරසීමක් වැනියැ.

මගෙ පසුගිය ලිපිය 2009 Version : තයෝධම්ම ජාතකය මෙතනින් බලන්න

ප්‍රතිචාර 15

Filed under ජාත්‍යන්තර, දේශපාලන

2009 Version : තයෝධම්ම ජාතකය

සාමාන්‍යයෙන් මා උදය කාලයේදී රූපවාහිනියේ විකාශයවන වැඩසටහන් නැරඹීමට අවස්ථාව නොලැබුවද, පසුගිය බ්‍රහස්පතින්දා (26) ස්වර්ණවාහිනියේ ලෝක සිතියම වැඩසටහන නැරඹීමට මම වාසනාවන්තවීමි. මෙම සටහනට පාදක වනුයේ එහි විකාශයවූ එක් පුවතකි.

පසුගිය 17 වනදා ඉන්දියාවේ, ඔරිස්සා ප්‍රාන්තයේ, පූරි දිස්ත්‍රික්කයේ, අස්තරන් පොලිස් ස්ථානයේදී එක් සුවිශේෂී පැමිණිල්ලක් සටහන්විය. එනම්, “ජුමුරි” නම් වැඳිරියක විසින් තම ස්වාමි වඳුරාවන “රාජා” ට විරුද්ධවයි. පැමිණිල්ලට හේතුව වනුයේ ඔවුන්ගේ දරුවාවන “කුනා” නමැති තෙමස් වියැති වඳුරු පැටවාව ඝාතනයට රාජා විසින් කිහිපවිටකම උත්සාහ දැරීමයි. කුනා යනු ඔවුන්ගේ දෙවන දරුවායි. මීට පෙර පළමු දරුවාව රාජා විසින් මරා දමා තිබේ. එබැවින්, කුනාගේ ආරක්ෂාව වෙනුවෙන් ජුමුරි, ගම්මුන්ගේද සහය ඇතිව පොලිස් ආරක්ෂාව පැතීය. අස්තරන්හි පොලිස් පරීක්ෂක සතින්ද්‍ර කුමාර් දාස් මහතා ප්‍රරකාශ කරන අන්දමට, ඉන්දීය දණ්ඩ නීති සංග්‍රහයේ 363, 366, 507 හා 511 යන වගන්ති යටතේ මෙම පැමිණිල්ල සටහන්කරගෙන තිබේ.

මෙම පුවත දුටුවනම මාගේ මතකයට පැමිණියේ මීට සමාන ජාතක කාථාවක් ඇති බවයි. නමුත්, එහි නම මාගේ මතකයේ නොතිබූ අතර, මා සන්තකයේ ඇති සංෂිප්ත පන්සිය පනස් ජාතක පොත් වහන්සේ පෙරළා බලා මහත් පරිශ්‍රමයකින් අනතුරුව එය සොයාගන්නා ලදි. බොහෝ දෙනාගේ හිතසුව පිණිස එය මෙහි පළකරමි.

එක් සමයක බුදුරජාණන් වහන්සේ වේළුවනාරාමයේදී දෙව්දත් තෙරුන්ගේ වධ කිරීමේ උත්සාහයක් නිසා මේ ධර්මය වදාළ සේක.

අතීතයෙහි බරණැස බඹදත් නිරිඳුගේ කාලයෙහි දෙව්දත් තෙර වඳුරු ජාතියෙහි ඉපිද හිමාලය පෙදෙසෙහි වඳුරු සමූහයා පාලනය කරමින් තමන්ට දාව උපන් පැටවුන් “මොහු වැඩී වානර සමූහය පාලනය කරතී” බියෙන් දතින් සපා ඔවුන්ගේ බීජ උපුටා දමයි. එකල බෝධිසත්ත්වයෝ ද ඔහුට දාව වැඳිරි කුසක පිළිසිඳ ගත්හ. වැඳිරිය අන් කඳු පෙදෙසකට ගොස් දරුගැබ රැකගෙන බෝසතුන් ප්‍රසූත කළාය.බෝධිසත්ත්වයෝ වැඩී ජවබල ඇතිව මවගෙන් සිය පියාණන් ගැන විමසා ඔහු වෙත ගෙන යන ලෙස කීහ. වැඳිරිය සියලු තතු හෙළි කළද බෝසතුන්ගේ ඉල්ලීම පරිදි එහි ගෙන ගියාය. වඳුරු රජ පුතු දැකීමත් සමඟම දැන්ම මොහු තුරන් කළයුතුයයි සිතා ආදර බස් කියා පුතු වැළඳ ගන්නා ලෙස පෙන්වා තරයේ මිරිකාලීය. ඇත්බල ඇති බෝධිසත්ත්වයෝ ද එසේම තරයේ මිරිකා ලුහ. එවිට වඳුරු රජුට මැරෙන තරමේ වේදනාවක් දැනිණ. කවර උපායකින් හෝ පැටවා මරාදැමිය යුතුයයි සිතූ ඔහු “දරුව, මම දැන් මහලු වෙමි. තොපට අදම රාජ්‍යය පාවා දෙමි. වහා ගොස් අසවල් විලෙන් ඇඹුල, උපුල, නෙළුම්මල් ගෙනව” යි රාක්ෂසාධිගෘහිත විලකට පාර දැක්වීය. ඒ රාක්ෂසයා විලට බසින සියලු සතුන් කා දමයි.

බෝධිසත්ත්වයෝ එහි ගොස් එය රාක්ෂසාධිගෘහිත විලකැයි දැන උපායෙන් මල් කඩාගෙන යෙමී වේගයෙන් අහසට පැන උඩ නැඟී මල් කඩාගෙනම එතෙරට පනිති. ඒ ක්‍රමයෙන්ම මෙතෙරටත් පනිති. මෙසේ රාක්ෂසයාගේ අණසක ඇති දියටත් නොබැස මලුත් කඩන බෝසතුන් දැක පුදුමයට පත්ව දිය දෙබේ කොට මතුවී වඳුරාණෙනි මෙසේ පැමිණි බිය දුරු කිරීමේ ප්‍රඥාවෙන් යුත් වීර්යය, නිර්භීතකම, උපායඥානය යන තුන් ධර්මය යමෙකුට ඇත්නම් ඔහු සතුරන් ජයගන්නේයයි බෝසතුන්ට ප්‍රශංසා කළේය. ඉක්බිති මේ මල් කුමටදැයි විමසා සියතින්ම ඔසවා ගෙන බෝසතුන් පසු පස ගියේය. දුරදීම එන බෝසතුන් දුටු වඳුරු රජ රකුසන් කතී සිතා මම මොහු යැවීමි. දැන් රකුසා ලවාම මල් ගෙන්වා ගෙන එයි. විනාශකැයි ළය පැළී මළේය. වඳුරෝ එක්ව බෝසතුන් රජ කළාහුය.

මෙසේ මේ පුවත වදාළ සර්වඥයන් වහන්සේ එකල වඳුරුනායක දේවදත්ත ස්ථවිරයෝය. පුත්‍රයා නම් භාග්‍යවතුන් වහන්සේමයයි වදාළ සේක.

ප්‍රතිචාර 2

Filed under ජාත්‍යන්තර, රසවත්, සංවේදී

සඳ හොරෙන්, හොරෙන්, හොරෙන් ………

ඔබ පසුගිය සෙනසුරාදා (14) පුවත් නැරඹුවෙහිද ? සඳ පිළිබඳව යම් පුවතක් ඔබ දුටුවෙහිද ? එදින බොහෝ ජනමාධ්‍යයන්හි ප්‍රධාන පුවතක් වූයේ එක්සත් ජනපදයේ, ජාතික අභ්‍යවකාශ විද්‍යා හා අජටාකාශ මණ්ඩලය (නාසා/NASA) විසින් චන්ද්‍රයා මතුපිට ජලය සොයාගත් බවයි. CNN, BBC වැනි බටහිර මාධ්‍යයන්හට මෙය සුවිසාල පුවතක් විය. එබැවින් බටහිර ජනමාධ්‍යවල කටු ලෙවකන අපේ රටේ මාධ්‍යයන්හට මෙය පුවතක් වීම අරුමයක් නොවේ.

නමුත් මේ සියල්ලන්හට අමතකවූ කරුණක් ඇත. එනම්, පසුගිය සැප්තැම්බර් 24 වන දින, ඉන්දීය විද්‍යාඥයින් සඳමත ජලය පළමුවරට සොයාගත් බවයි. 2008 වසරේ නොවැම්බර් මස 14වන දින සඳ මතුපිටට බට චන්ද්‍රයාන් යානය මගින් මෙම සොයාගැනීම කිරීමට ඉන්දියානුවන් සමත්විය. එහිදී කියැවුනේ චන්ද්‍රයාමත තුනී ජල තට්ටුවක් ඇතිබවයි. නමුත්, මෙම පුවත සඳහා ලැබුනේ ඉතාමත් අඩු ප්‍රසිද්ධියකි.

තත්වය මෙසේ වුවද, පසුගිය 14 දින (චන්ද්‍රයාන් සඳ මතුපිටට ගොස් වසරක් පිරෙන දින ) බටහිර මාධ්‍යයන් මවා පෑමට උත්සාහ කළේ කුමක්ද ? ඇමරිකානුවෙක් සඳමතුපිට පා තබා 40 වසරක් ඉක්මගියද, ඔවුන්ට පෙර ඉන්දියාව පළමුවෙන් සඳමත ජලය සොයාගනීම ඔවුන්ට සිදුවූ අවමානයක් ලෙස ඔවුන් දකීද ? මේ පිළිබඳව ඇමරිකානු විද්‍යාඥයන් පවසන්නේ ඔවුන් කුඩා ප්‍රමාණයක් නොව, විශාල ප්‍රමාණයක් ජලය සොයාගත් බවයි. කුඩා ප්‍රමාණයක් වේවා විශාල ප්‍රමාණයක් වේවා, පළමුව සඳ මත ජලය සොයාගත්තේ ඉන්දියාවබව ඇමරිකානුවන්ට සැඟවිය හැකිද ?

  • මේ පිළිබඳව මා නොදන්නා යම් කරුණක් ඇත්නම් පැවසීමට කාරුණික වන්න.

ප්‍රතිචාර 8

Filed under ජාත්‍යන්තර, විද්‍යාව

අතට ගත් පසු කටට දා ගැනීම

DSC00444

2008 වසරේදී මා උසස් පෙළ ගණිත අංශයෙන් ප්‍රථමවර පෙනී සිටි අතර, මැවිසුරු පීඨයට (Engineering Faculty) සුදුසුකම් ලැබීමට මම සුදුසුකම් නොලැබීමි. පවුලේ ඥාතීහු හා ගුරුවරු මා දෙවනවර ද උසස් පෙළට පෙනීසිටී යයි සිතුවද, මාහට මගේම වූ අරමුණක් විය. මාගේ අරමුණ වූයේ භෞතීය විද්‍යා පාථමාලාව හැදෑරීමයි.

කැලණිය සරසවියට මා ඇතුල්වූ දිනය පිළිබදව මම ලිවූ ලිපිය ඔබලාට මතක ඇතැයි සිතමි. මෙලෙස කැලණිය සරසවියට මා පැමිණියද, විශ්ව විද්‍යාල ප්‍රතිපාදන කොමිෂන් සභාව මගින් මා තෝරනු ලැබුවේ ශ්‍රී ජයවර්ධනපුර විශ්වවිද්‍යාලයේ භෞතීය විද්‍යා පාඨමාලාවටය. ජ’පුර මා සති 3ක් ( හැඩගැස්වීමේ වැඩසටහන සති 2ක් හා දේශන සතියක් ) රැදී සිටි අතර, එය ඉතාමත් මිහිරි සමයක් විය. නව මිතුරන් රැසක් සමග ඉන්දරේ අයියාවද එහිදී මට මුණ ගැසීමට හැකිවිය. facebookවලට පිං සිදුවීමට ඔවුන් සමග තවමත් සබදතා පැවැත්වීමට මාහට හැකිවී තිබේ. ජ’පුර විද්‍යා පීඨයේදීද මාගේ අරමුණකරා ලඟා වියහැකිව තිබුණද, මම දකින අන්දමට කැලණියේදී වඩා පුළුල්ලෙස මාගේ ප්‍රියතම විෂයන් හැදෑරීමේ හැකියාවක් ඇත. එබැවින් මම අභියාචනයක් මගින් කැලණිය විශ්වවිද්‍යාලයේ භෞතීය විද්‍යා පාඨමාලාව ලබාගතිමි.

කැලණියේ සති 4ක් වූ හැඩගැස්වීමේ පාඨමාලාවේ, අවසාන සති 3 වෙන්කර තිබූයේ සිංහල, ඉංග්‍රීසි හා ආචාර ධර්ම යන විෂයන් ඉගෙන ගැනීමටයි. මෙහිදී, අප බොහෝ තෘප්තියක් ලැබූයේ ඉංග්‍රීසි හැදෑරීමේදීය. එහි තිබූ විවිධ ක්‍රියාකාරකම් මගින් අප තුළ සැගව තිබූ දක්ෂතා හදුනාගැනීම, නිර්මාණශීලීත්වය වර්ධනයකර ගැනීමටද අපට අවස්ථාවන් පෑදින. නවක විද්‍යාර්ථයින් සදහා සිංහල හා ආචාර ධර්ම ඉගැන්වීම පිළිබදව සිංහලයෙකුලෙස මා කැමතිවුවද, විද්‍යා ශිෂ්‍යයෙකු ලෙස බැලීමේදී එහි යම්යම් අඩුපාඩු දැකියහැකිවේ.

මෙහිදී තවමත් මාගේ සිතේ වේදනාදෙන සිදුවීමක් ඔබ හමුවේ පැවසීම යුක්ති යුක්ත යැයි සිතමි. ඉංග්‍රීසි විෂයෙහි අපට ලැබුණු එක් ක්‍රියාකරකමක් වූයේ ලෝකයේ මානව හිමිකම් කඩවන අවස්ථාවක් පිළිබදව එක් එක් කණ්ඩායම් දැන්වීමක් සෑදීමටයි. මෙහිදී මා තෝරාගනු ලැබූයේ ඉරාකයේ ඇමරිකන් හමුදාවන් අතින් සිදුවන මානව හිමිකම් කඩවීමයි. මෙහිදී “මා තෝරාගනු ලැබූවේ” යනුවෙන් පැවසීමේදී ඔබ තුළ විමතියක් ඇතිවූයේනම් ඒ පිළිබදව මම පුදුම නොවෙමි. මන්ද, මෙය කණ්ඩායම් ක්‍රියාකාරකමකි.නමුත්, අටදෙනෙකුගෙන් යුත් කණ්ඩායමේ සිටියේ මා ඇතුළුව පිරිමි ළමුන් දෙදෙනෙකු පමණි. අප දෙදෙනා තීරණයක් ගැනීම, කණ්ඩායම තීරණයක් ගැනීම හා සමානවිය. මන්ද, ගැහැණු ළමෝ ප්‍රවෘත්ති නොබලති, නොඅසති. රටේ තොටේ සිදුවන කිසිවක් ඔවූහු නොදනිති. කෙසේහෝ මේ ක්‍රියාකාරකම සදහා අපට හිමිවූයේ එක් දිනක් පමණක් බැවින් එදින දිවා අහරද අමතක කොට මා හා අනෙක් මිතුරා Internet Cafe 1ක් වෙත බඩගෑවේය. අප දෙදෙනා අපට අවශ්‍ය තොරතුරු ඉතිරිකරගෙන අන්සියල්ල අපි ඔවුන් වෙත ලබා දුන්නෙමු. අප සතුවූ තොරතුරු පිළිවෙළකට සකස් කොට, මා එක් වාක්‍යයක් පැවසූපසු, අනෙක් වාක්‍යය මිතුරාද කියන ආකාරයට පිළිවෙලකට සැකසීමි. පිංතූරද පිළිවෙලකට සැකසීමි. තේමා වාදන සංගීත ඛණ්ඩයක්ද සොයාගතිමි. මට අවශ්‍යයවනුයේ එතෙක් මෙතෙක් බිහිවූ හොදමදේවල් කිරීමටයි. පසුදින සරසවියට ගොස් බැලීමේදී, දක්නට වූයේ අපදුන් මුද්‍රිත පිටපත් (Print Out), අපගේ සාමාජිකාවන් අත තවමත් එලෙසම තිබෙන අයුරුය. ඇතමුන් වාක්‍යය සාදමින් සිටී. ඇතමුන් මුද්‍රිත පිටපත් අත තබාගෙන මාසයෙන් මාසයේ වසර හයක මියගිය ගණන් කියවීය. මම මොවුන්ට එසේ නොකරනමෙන් සිංහලෙන් ඉල්ලා සිටියද ඵලක්වූයේ නැත. අවසානයේදී මිනිත්තු 5 -10 අතර වියයුතු දැන්වීම, මිනිත්තු 20කට කිට්ටු විය. ඔවුන් ලබාදුන් එකම නිර්මාණශීලී අදහස වූයේ, අවසානයේ මයිකල් ජැක්සන්ගේ Heal the World ගීතය ගැයීමයි. මේ වර්තමාන ගැහැණු ළමයින්ගේ බුද්ධිය හා නිර්මාණශීලීත්වයයි.

සිංහල විෂයේදී අප ලත් අත්දැකීම් පිළිබදව පැවසීමේදී මහාචාර්ය ගාමිණී දෑල බණ්ඩාරයන් අමතක කළ නොහැක. එතුමාගේ තර්කානුකූල කරුණු දැන්වීම, සිංහල විෂයය අතිරේක විෂයක් ලෙස හැදෑරීමට මා තුළ තිබූ ආශාව වැඩිකිරීමට සමත්විය. තවද, එක් මහාචාර්ය වරයෙක් සාහිත්‍යය විචාරයක් කිරීමේදී, ඔහුට යම් කරුණක් පැවසීම මගහැරුණි. මද වේලාවකින් ඔහුටම එය වැටහී ” මට අරක අමතක වුනා ” යනුවෙන් පැවසීය. මහාචාර්යතුමාට අමතක වූ බව අපට අමතකය. ඒ තරමට අපි අවධානයෙන් සිටියෙමු.

කෙසේ වුවද, දැන් හැඩගැස්වීම් කාලය අවසානයි. ලබන සදුදා සිට දේශන ආරම්භවේ. පළමු දේශනය ලෙස ඇත්තේ, 10 ශ්‍රේණියේ සිට මා පෙම්කළ විෂය වූ ඉලෙක්ට්‍රොනික්ස් ය. පළමු සමාසිකය තමා කැමති විෂය පථයකින් හැදෑරිය හැක. අනතුරුව පළමු සමාසිකය අවසාන විභාගයේ ලකුණුමත අප සුදුසුකම් ලබන විෂයයන් තීරණයවේ. එබැවින් මම දැන් මට අවශ්‍යය වූ දෙය අතට ගෙන ඇත, ඇත්තේ කටට දා ගැනීමයි.

ප්‍රතිචාර 6

Filed under මට වෙච්ච වැඩ, මම, විශ්ව විද්‍යාලය

ඔව් අම්මේ ඒ මැරෙන්න ගිය දුප්පත් කෙල්ල අද දොස්තරවරියක්

මම අමන්දි. මගේ මව කුවේටයට ගියේ මට අවුරුදු හතේදි. මට අම්මව යන්තමට මතකයි. අම්මත් එක්ක දවසක් කුරුණෑගල රෝහලෙන් බේත් අරගෙන ආ දවස අද වගේ මට මතකයි. එදා මගෙ මරණය සිද්ධ වෙන්න තිබුණු දවසක් කියලා කීවේ මගේ ආච්චි. එදා අම්මා මාව කුරුණෑගලට අරගෙන ගියේ පයින්ලු. කුරුණෑගල රෝහල ළග ඉදන් අපේ ගෙදරට හරියටම සැතපුම් තිහක් තියෙනවා. අම්ම කොහොමද මාව ඒ තරම් දුරක් පයින් එක්ක ගියේ. මට දැන් අම්ම කරපු ඒ දේ ගැන හිතද්දි ඇති වන්නේ අම්ම ගැන පුදුම ආදරයක්. මම අම්මට කවදාවත් බනින්නේ නෑ. එයා මගෙ පණ බේරුව මගේම අම්මා.

එදා මට හොදටම උණලු. රෝහලෙන් බේත් අරගෙන ගෙදර ආවෙත් පයින්ලු. අපේ ගම දුප්පත් ගමක්. තාර පාරේ ඉදන් සැත්පුම් පහමාරක් තියෙනවා අපේ ගේ ළගට. ඒ පාර ගුරු පාරක්. පාර දිගට පොල්වතු. ඉද හිටලා තමයි ගෙයක් තිබුණේ. රෝහලේ ඉදන් මාව වඩාගෙන අම්ම ඒ ආපු ගමන අම්මට බුදුවෙන්න තරම් ප්‍රමාණවත්. අපිව වැස්සට අහුවුණේ ඒ පොල් රුප්පා මැදදි. ඉහලන්න කුඩයක්වත් අම්මා ළග තිබිලා නෑ. අම්ම අඩ අඩා මාව ගෙදරට ගෙනාවේ රෙද්දක ඔතාගෙනලු. දෙයියෝ මාව බේරුව කියලයි ආච්චි කියන්නේ.

එහෙම මගෙ ජීවිතේ බේරපු අම්ම මාව දාල කුවේටයට ගියේ 1990 වසරේ. මගේ තාත්තා මම පොඩි කාලෙම මිය ගියා. තාත්තගේ රස්සාව වුණේ පොල් කඩන එක. තාත්තා මිය ගියේ පොල් ගහකින් වැටිලා. තාත්තා නැති අඩුව මට නොදැනුනේ තාත්ත කොයි වගේද කියලවත් මම නොදන්න නිසයි. මම ඉපදිලා අවුරුද්දකට පස්සෙයි තාත්තා මැරිලා තියෙන්නේ.

අම්මා රට ගියේ වෙන කරන්න දෙයක් නැති තැනලු. ආච්චි අම්ම තමයි මට හිටපු එකම ඥාතියා.කුවේටයට ගිය අම්මා ඊට පස්සේ මට දකින්න ලැබුණේ නෑ. එයා ඉන්නවද නැද්ද කියලවත් මම දන්නේ නෑ.

අම්මගේ නම වත්සලා රණවීර. රණවීර ආරච්චිගේ වත්සලා තමයි එයාගේ සම්පූර්ණ නම. අම්මාගේ උපන්ගම කොළඹ බොරැල්ලෙ. අම්ම රට ගියාට පස්සේ අවුරුදු තුනක් පමණ ආච්චි අම්මට මුදල් එව්වා. ඒ මුදල්වලින් ආච්චි අම්මා මට ඉගැන්නුවා. පොල් අතු හෙවිලි කරලා තිබුණ ගේ වෙනුවට උළු හෙවිළි කරපු ගෙයක් හදන්නත් ඒ සල්ලි ප්‍රමාණවත් වුණා. අපේ ගෙට කාමර දෙකක් තියෙනවා. කුස්සිය, ආලින්දියට අමතරව ඉස්තෝප්පු කෑල්ලකුත් තිබෙනවා. අම්ම එවපු ටී. වී. එක මේ ලිපිය ලියන මොහොතෙත් මට පේනව. අම්ම මට එවපු ඇදුම් පවා තවමත් මගේ අල්මාරියේ තියෙනව.ඒත් මට ඒ අම්ම දකින්න පින නෑ. 1990 දී කුවේටයට ගිය අම්මා 1993 න් පස්සේ අපිට ලියුමක්වත් එව්වේ නෑ. අනේ අම්මේ ඉන්න තැනකින් ගෙදර එන්න. අම්මාට පුදුම හිතෙන දෙයක් කියන්න මම මග බලාගෙන ඉන්නේ. අම්මට මතකද එදා වැස්සෙ තෙමීගෙන කුරුණෑගල රෝහලේ ඉදන් පයින්ම මාව වඩාගෙන ගෙදර ආපු හැටි.

එදා මගෙ උණ වැඩිවෙලා, සෙම්ප්‍රතිශ්‍යාව වැඩිවෙලා මම විදපු වේදනාව දැකලා අම්ම මටත් වැඩිය හයියෙන් අඩපු ඒ දවස මතකද ? මගේ රත්තරං අම්මේ. අම්මා තාමත් ජීවතුන් අතර ඉන්නවා කියලා මට විශ්වාසයි. අම්මට මගේ අතින් බේත් ටිකක් පොවන්න මම කොච්චර ආසද ? අම්මගෙ ප්‍රෙෂර් එක බලන්න, අම්මට උණ ගැනුනම බේත් දෙන්න. මම කොච්චර ආශාවෙන්ද ඉන්නේ අම්මේ.

එදා සැතපුම් තිහක් ගෙවාගෙන පයින්ම කුරුණෑගල රෝහලට උස්සගෙන ආපු ඒ දුප්පත් කෙල්ල අද දොස්තරවරියක් කියලා අම්ම දන්නවද ? ඔව් අම්මේ ඒ මැරෙන්න ගිය දුප්පත් කෙල්ල අද දොස්තරවරියක්. අම්ම දන්නවද අම්මේ, දුප්පත් දරුවෝ හොය හොයා ඒ අයට බේත් දෙනවා කියලා. මම දුප්පත් අයගෙන් සල්ලි ගන්නේ නෑ. අම්ම, තාත්තා නැති දරුවෝ  වෙනුවෙන් මම මගේ සේසතම වුණත් වැය කරනවා. අනේ අම්මේ ඔය කුවේටයේ හිටියා ඇති. ඉන්න තැනකින් අම්මගෙ දොස්තර දුව බලන්න එන්න. අම්මා ඔය රටේ බැල මෙහෙවර කළා ඇති.ආච්චියි මමයි දැන් ඉන්නේ කොළඹ. අපේ පරණ ගෙදර එහෙමම තියෙනවා. ඒ ගෙදර අද ඉන්නේ අපි වගේම දුප්පත් පවුලක්. ඒ පවුලෙත් දුවක් ඉන්නවා. එයාලට සලකන්නේ මමයි. අම්මට ඒ ගෙදරට ඇවිත් මාව හොයා ගන්න පුළුවන්.

මේ ලිපිය පත්තරේ පළ වුණොත් මගෙ අම්ම මේක දකීවි කියලා මට විශ්වාසයි. කුවේටයට ගිය අම්මගේ පින්තූරයක්වත් මගෙ ළග නෑ. ඒ රටේ කොහේ ඉන්නවද කියලා දන්නෙත් නෑ. ශ්‍රී ලංකා විදේශ සේවා නියුක්ති කාර්යාංශයෙන් මේ ගැන විමසන්න කිසිම ලියකියවිල්ලක් නෑ. මගෙ රත්තරං අම්මේ, මාව බලන්න ලංකාවට එන්න.

මේ අම්මගෙ
සෙනෙහස ඉල්ලන අමන්දි දුව.

ඉහතින් දක්වා ඇත්තේ අද දින ( 25 – 10 – 2009 ) දිවයින මැද පෙරදිග අතිරේකයේ පළවූ ලිපියකි. මෙය මෙරට ඇති මෙවන් කථා අතර තවත් එක් කථාවක් පමණයි. වර්ථමානයේදී ශ්‍රී ලංකාවට විදේශ විනිමය ලැබෙන ප්‍රධාන මාර්ගයක් වනුයේ විදේශ සේවයයි. සැබැවින්ම නම්, මෙරට සියලු පුරවැසියන් පිටරටින් ගෙන්වා කන පාන් පෙත්තක් ගානේ මොවුන්ට ණයය. නමුත්, මෙලෙස කාන්තාවන් විදේශ සේවා සදහා යැවීම මා අනුමත නොකරයි. ඉහත සිදුවීම එක් විශේෂ අවස්ථාවකි. අමන්දි ළග දෙමාපියන් නොසිටියද, මව එවූ මුදල් නිසිලෙස කළමණාකරණය කරමින් මැයට හොද අධ්‍යාපනයක් ලබාදීමට මැයගේ ආච්චි සමත්විය.නමුත් බොහෝවිට සිදුවන්නේ, මෙරටට එවන මුදල් යමෙකුගේ බේබදුකමට, සූදුවට ආදීලෙස නැතිනාස්තිවීමයි. අවසානයේදී දරුවන්ට මවගේ සෙනෙහස අහිමිකර ඔබ විදේශගත වූවාට ලැබූ දෙයක් නැතිවියහැක. ඇතැම්විට පවුල් ජීවිතයද විසිරීයෑහැක.

මෙහිදී තවත් එක් සිදුවීමක් මාගේ මතකයට පැමිණේ. මාගේ මිතුරෙකුගේ මවත්, පියාත් දෙදෙනාම සිටින්නේ විදේශගතවයි. ඔහුව රැකබලා ගනු ලැබුවේ ඔහුගේ මිත්තණියයි. ඔහු කුඩා කළ සිටම තම මිත්තණියට අමතනු ලබන්නේ ” හොද අම්මා ” යනුවෙන්ය. ඔව්, ඔහු සිටින්නේ තම මව සමග කෝපයකින්.

ප්‍රතිචාර 4

Filed under සංවේදී